Ist
GARDA.ID | Siswa Pasinaon Purna Catur
1.
Dhandhanggula
Bu Windari sigra mandhegani,
Wulan prasetyoningsih Noor Irsyad,
Wahyu Triningsih nut gawe,
Sri Hartini lumaku,
Ayu Indah Puspitasari,
Nherek Ratna Kartika,
Yulianto tuhu,
Muhammad Suyanto pirsa,
Laillatul Nikmah Mira Andriyani,
Haris Kris lumaksita.
Tata cara kinarya memanis,
Wisuda ing Kraton Surakarta,
Pindha mutyara rinonce,
Asri busana agung,
Beskap cemeng blangkon lan samir,
Jarik selop kebayak,
Gelung rengga sanggul,
Lenggah tumungkul ing manah,
Murwakani puja asesanti,
Ing Bangsal Smarakata.
2.
Mijil
Pacak baris siyaga lumaris,
Dinten Setu Kliwon,
Wisudan ing patbelas Desember,
Rong ewu patlikur wus pinilih,
Tata cara tampi,
Kekancingan luhur.
3.
Asmarandana
Peparing ganjaran nami,
Pangkat saha sesebatan,
Muncar sumunar prabane,
Cihna undhaking derajat,
Sakjeroning masyarakat,
Kondhang umum asma arum,
Wibawa bagya widada.
4.
Pangkur
Lenggah sila sluku tunggal,
Marikelu mireng wejangan gati,
Widyatama wulang wuruk,
Wedharan kasusilan,
Unggah ungguh tata krama tanggap tangguh,
Surakarta Hadiningrat,
Karaton ing tanah Jawi.
5.
Gambuh
Tata tutur sumawur,
Manah agung penggalih ngrembuyung,
Jroning kapti sedyaning arsa ngleluri,
Budaya sangsaya luhur,
Jagade tambah mencorong.
6.
Pucung
Subur makmur pangajab sangsaya mujur,
Purna Winisuda,
Rejekine mbanyu mili,
Tyas raharja pinaringan arta daya.
7.
Kinanthi
Mahargya mitra sedulur,
Sami suwita sejati,
Dhateng Kraton Surakarta,
Pikantuk berkahing Widi,
Tandang gancar karya lancar,
Dagang tani sarwa bathi.
8.
Megatruh
Sigra weruh uripe antuk pituduh,
Rekadaya murakabi,
Maju ber bandha ber bandhu,
Laras laris manis aris,
Pangesthi mutih kewahyon.
9.
Sinom
Abdi dalem Surakarta,
Panjang punjung pasir wukir,
Loh jinawi gemah ripah,
Tata harja barang kapti,
Mersudi urup urip,
Jumbuh kang samya ginayuh,
Sembada kang sinedya,
Wastra waras wareg wasis,
Mbudidaya gesang terang bagya mulya.
10.
Durma
Alun alun pagelaran pamurakan,
Gladhag sitihinggil,
Prapteng balerata,
Gapura kamandhungan,
Marcukundha prapteng manganti,
Nguntarasana,
Sentana arsa sumiwi.
11..
Maskumambang
Tunggal cipta rasa karsa karya budi,
Sukengtyas maring sesama,
Nusa bangsa darma bakti,
Abdi dalem Surakarta.
Setu Kliwon,
14 Desember 2024
Purwadi,
Universitas Negeri Yogyakarta