Ist
Garda.id | Abdi Dalem Pakasa Klaten
1.
Sinom
Kempal sedya gya manunggal,
Sami caos bulu bekti,
Saraya setya rumeksa,
Gawa gawe amakarti,
Greget gregah memetri,
Kabudayan trus lumaku,
Asung puji pandonga,
Gagas sanggit pikir anggit,
Jogonalan Klaten desane Kraguman.
2.
Dhandhanggula
Pakasa ing Manisrenggo Wedhi, Kecamatan Gantiwarno Bayat,
Kemalang Jatinom Ceper,
Karangdowo Delanggu,
Kalikotes Trucuk Juwiring,
Sedaya sesarengan,
Kebonarum Tulung,
Karanganom tlatah Cawas,
Tunggal kapti lenging tekad trus mengabdi,
Mring Kraton Surakarta.
Warga Klaten sigrak tandang kardi,
Budaya bangsa terus ngrembaka,
Mekar sumebar mandhireng,
Jembar kuncara arum,
Jawat asta rumeksa sami,
Karaton Surakarta,
Mangka talining suh,
Sihing kagunan ngrumpaka,
Pra pujangga medhar mejang wiyatadi,
Terang asung pepadhang.
Mandhegani Ratu Wandhansari,
Pangagenging Sasana Wilapa,
Rikala pahargyan gedhe,
Warga Klaten sadarum,
Sowan abdi dalem negari,
Siyaga pra sentana,
Suguh gupuh aruh,
Binuka wejaring kandha,
Saraya setya rumeksa asesanti,
Karaton Surakarta.
Labuh labet dhamateng negari,
Besus alus angagem busana,
Adat budaya Kejawen,
Ketingal adi luhung,
Edi peni sumunar asri,
Eram tenan tumingale,
Pangarsa umatur,
Jangkahe warga Pakasa,
Amarsudi warisan luhur lestari,
Ayem tentreming jagad.
3.
Pangkur
Pangarsa wusnya ngendika,
Pisowanan amrih yuwana becik,
Warga Klaten runtut patut,
Wicara lembah manah,
Sampun kesdu paring yogya pambiyantu,
Budaya mrih lumaksana,
Gancar lancar manis aris.
4.
Mijil
Wus rinengga ngumandhanging gendhing,
Swara ngrangin alon,
Dhedhep tidhem ing sakjroning bale,
Sasana Handrawina pinilih,
Papan merbawani,
Sumorot rahayu.
5.
Kinanthi
Abdi Klaten trus anggayuh,
Ketitik bisane becik,
Nguri uri kabudayan,
Dangu Karaton kawuri,
Surakarta Hadiningrat,
Punjer sumber tanah Jawi.
6.
Maskumambang
Jangkah langkah abdi dalem rikat aglis,
Warga Pakasa tumindak,
Klaten tumangkar manis,
Dunya basuki raharja.
7.
Durma
Tekad waja budi karsa mbabar karya,
Karana jroning kapti,
Gagah megah endah,
Gita gita sumagah,
Warga Pakasa Klaten becik,
Sumanggem sumarah,
Tata cara wigati.
27 Desember 2024,
Purwadi,
Ketua Lokantara