Garda.id | Babad Boga Kawedhar
1.
Dhandhanggula
Boga wastra kawedhar winarni,
Dadi srana ketahanan pangan,
Mujudake gawa gawe,
Pangajab cekap cukup,
Kadang tani sengkut makarti,
Tanduran palawija,
Palagandhul thukul,
Palapendhem palasimpar,
Palamambang palatumpang palakitri,
Murih mulyaning praja.
2.
Gambuh
Pari jagung ngrembuyung,
Banyu kedhung wus ngocori puhung,
Bayem kubis tales lumbu sledri buncis,
Sawi kangkung lung lembayung,
Jipang gori kluwih terong.
Jajar jejer wit dhuku,
Pisang raja gedhang kepok jambu,
Wohing manggis sayekti rasane manis,
Nyandhing blimbing jeruk mathuk,
Pelem sawo salak pondhoh.
Sregep ngopeni lembu,
Menda kuda maesa den ingu,
Bebek menthok banyak ayam kuthuk meri,
Puyuh kelinci trowelu,
Badher tawes bandeng tongkol.
3.
Pangkur
Gumregut greget gumregah,
Tandang kardi tata titi permati,
Boga wastra gya ginayuh,
Ayahan tegal sawah,
Sabar subur karang padesan wus makmur,
Pra kawula saknegara,
Ayem tentrem lahir batin.
4.
Kinanthi
Pacul piranti pinunjul,
Tumrap sagung mitra tani,
Garu luku jugil krakal,
Ganco bendho pecok arit,
Prekul pethel tlabung lempak,
Gejik kentheng ani ani.
5.
Sinom
Dhahar eca tur mirasa,
Sega golong sekul kuning,
Sega liwet awet liwat,
Megana tlatah pesisir,
Buran Lamongan gurih,
Sega uduk wadhah pincuk,
Tumpeng kanggo slametan,
Boga wastra kang anganthi,
Wareg waras ajeg tuntas jejeg bergas.
6.
Asmarandana
Gerih garing balur teri,
Dhendheng ragi iwak empal,
Kare rawon gule sate,
Kondhang tenan ayam panggang,
Thengkleng soto bebek bakar,
Imbah imbuh bareng lawuh,
Enak eca seger sumyah.
7.
Pucung
Tempe tahu kanggo lawuh nyata perlu,
Opak kriyuk enak,
Bothok simbukan ngangeni,
Pepes renyah bandeng seneng weh sumringah.
Kiyak kiyuk sega wadhang lawuh krupuk,
Cuwek cuwo layah,
Lalapan sambel kemangi,
Lungguh klasa sela tumpang ati lega.
8.
Megatruh
Sarwa mathuk esuk esuk sami ngunjuk,
Wedang rondhe sere kopi,
Kenthel jahe susu madu,
Atis suguhan teh manis,
Mat matan anget miraos.
9.
Durma
Boga wastra sakukuban tanah Jawa,
Dadi rembug wigati,
Kudu tansah ana,
Sumadiya ben dina,
Gemi nastiti ngati ati,
Weruh petangan,
Wulang wuruk taberi.
10.
Mijil
Mbudidaya sandhang pangan ugi,
Pakarti wigatos,
Genah genep jangkep tekat gedhe,
Tumraping sagung warga negari,
Tansah mawas dhiri,
Tanggap tanggon tangguh.
11.
Maskumambang
Darma bakti sumungkem ibu pertiwi,
Omber turah boga wastra,
Tumpa tumpuk saben warsi,
Nusantara tetep jaya.
Purwadi,
Jl Kakap Raya 36 Minomartani Yogyakarta Hp 087864404347